Thir poems bi Marion Angus is fae "The Country Series of Contemporary Poetry" (Fowler Wright, Ltd, 1927). ~THE TURN OF THE DAY =Under the cauld, green grass ==I hear the waukenin’ burn. ==The day’s at the turn-- =Oh, winter, dinna pass! =Your snaw was white for a bride, ==Your winds was merriage wine. ==Love is fine, fine, =But it doesna bide. =The saft, warm April rain ==An’ the clear June day, ==An’ floors o’ the May-- =I’ll see them a’ my lane. =Under the cauld, green grass, ==Wee waukenin’, wanderin’ burn, =Sing your ain sang. ==The day’s at the turn, =But simmer’s lang, lang. ~THE GRACELESS LOON =As I gaed east by Tarland toun, =I heard a singin’ neath the mune: =A lass sang in a milk-white goon ==Aneath a ha’thorne-tree. =The sma’ green trees bowed doon til her; =The blooms, they made a croon til her; =I was a graceless loon til her, ==She frooned and scorned at me. =Fu’ mony a year o’ sun and rain, =An’ I’m for Tarland toun again, =Wi’ drift upon a cauld hearth-stane ==An’ a wind gaen thro’ the Wynd. =Oh, lass, tho’ a’ yer sangs be dune, =Ower leafless thorn aye hanges the mune; =Turn ye until yer graceless loon ==Gin ye’ve grown auld and kind.